ತಮ್ಮಲ್ಲೇ ತಪ್ಪುಗಳನ್ನು ಇಟ್ಟುಕೊಂಡು ಬೇರೆಯವರನ್ನು ದೋಷಿಸುವ ವ್ಯಕ್ತಿಗಳಿಗಾಗಿ ಇಲ್ಲೊಂದು ಸುಂದರವಾದ ಕಥೆ..!!

ಇಬ್ಬರು ಮೊಮ್ಮಕಳು ಸೇರಿ ಅಜ್ಜನ ಮೂಗಿನ ಹತ್ತಿರ ಒಂದು ಕೊಳೆತ ಹಣ್ಣಿನ ಸಿಪ್ಪೆಯನ್ನು ತಿಕ್ಕಿದರು. ಆದರೂ ಅಜ್ಜ ಏಳಲಿಲ್ಲ, ಕೆಲ ನಿಮಿಷದ ನಂತರ ಎಚ್ಚರಗೊಂಡ ಅಜ್ಜನಿಗೆ ಅಚ್ಚರಿ ಕಾದಿತ್ತು. ರೂಮಿನಲ್ಲಿ ಏನೋ ಕೆಟ್ಟ ವಾಸನೆ ಬಂದಂತಾಯಿತು. ಈ ಕೋಣೆ ತುಂಬಾ ಕೊಳಕಾಗಿದೆ ಎಂದು ಹೊರಗೆ ಹೋದ.

ಹೊರಗೆ ಹಾಲ್-ನಲ್ಲಿ ಟಿವಿ ನೋಡಲು ಕುಳಿತ ಆದರೆ ಆ ಕೆಟ್ಟ ವಾಸನೆ ಅಲ್ಲಿಯೂ ಬಿಡಲಿಲ್ಲ.ಅಯ್ಯೋ ಈ ಕೋಣೆಯು ಕೂಡ ಕೊಳಕು, ಸರಿಯಾಗಿ ಸ್ವಚ್ಛ ಮಾಡಿಲ್ಲ ಇಲ್ಲಿಯೂ ಸಹ ಕೊಳೆತ ವಾಸನೆ ಬರುತ್ತಿದೆ, ಎಂದು ಹೊರಗಡೆ ಹೋದ.ಹೊರಗೆ ಅಂಗಳದಲ್ಲೂ ಕೂಡ ಮತ್ತದೇ ವಾಸನೆ ಹಿಂಬಾಲಿಸಿತು, ಮನೆಯವರಿಗೆ ಹಿಡಿ ಶಾಪ ಹಾಕಿದ ಅಜ್ಜ ಈಗಿನ ಕಾಲದವರಿಗೆ ಮನೆಯನ್ನು ಸ್ವಚ್ಛವಾಗಿ ಇಟ್ಟುಕೊಳ್ಳುವುದಕ್ಕೆ ಬರುವುದಿಲ್ಲ ಎಂದು ವಾಕ್ ಮಾಡಲೆಂದು ಉದ್ಯಾನವನದೆಡೆಗೆ ಹೊರಟ. ಎಲ್ಲಿ ಹೋದರು ಆ ವಾಸನೆ ಅವರನ್ನು ಹಿಂಬಾಲಿಸುತ್ತಿತ್ತು, ಈ ನಗರ ಸಭೆಯವರಿಗೆ ರಸ್ತೆಯನ್ನು ಸ್ವಚ್ಛವಾಗಿಡಲು ಬರುವುದಿಲ್ಲ ಎಂದು ಬೈದುಕೊಂಡ.

ಹೀಗೆ ಮುಂದೆ ಸಾಗುತ್ತ ಉದ್ಯಾನವನ ಸೇರಿದ ಅಲ್ಲಿ ಕೆಲ ಕ್ಷಣ ವಾಕ್ ಮಾಡಿದ ಅಲ್ಲಿಯೂ ಸಹ ವಾಸನೆ ಬಿಡಲಿಲ್ಲ ಈ ಸರ್ಕಾರಕ್ಕೆ ಉದ್ಯಾನವನ ನಿರ್ವಹಿಸಲು ಬರುವುದಿಲ್ಲ ಎಂದು ಬೈಯುತ್ತಾ ಮನೆಯ ಕಡೆಗೆ ನಡೆದ. ಮನೆಯಲ್ಲಿ ಮುಖ ತೊಳೆಯಲೆಂದು ಹೋದಾಗ ಕನ್ನಡಿಯಲ್ಲಿ ಮೂಗಿನ ಕೆಳಗೆ ಆಂಟಿಕೊಂಡಿದ್ದ ಆ ಕೊಳೆತ ಹಣ್ಣಿನ ಸಿಪ್ಪೆಯನ್ನು ನೋಡಿದ.