ಪ್ರೀತಿಯ ಅಣ್ಣ ತಮ್ಮಂದಿರ ಒಂದು ಬಾಂಧವ್ಯದ ಕಥೆ..!!

ಒಂದು ಊರಿನಲ್ಲಿ ಇಬ್ಬರು ಅಣ್ಣ ತಮ್ಮಂದಿರು ಇದ್ದರು. ಅವರು ಒಬ್ಬರನ್ನೊಬ್ಬರು ಬಹಳ ಪ್ರೀತಿಸುತ್ತಿದ್ದರು. ತಮ್ಮನಿಗೆ ಮಕ್ಕಳು ಹೆಚ್ಚು. ಅಣ್ಣನಿಗೆ ಮಕ್ಕಳು ಇರಲಿಲ್ಲ. ಆ ಅಣ್ಣ ತಮ್ಮಂದಿರು ಎಂದೂ ಜಗಳ ವಾಡುತ್ತಿರಲಿಲ್ಲ. ಆದರೆ ಮನೆಯಲ್ಲಿ ಮಡದಿಯರ ಕಾಟ, ಜಗಳ ಪ್ರಾರಂಭವಾಗಿ ಬರಬರುತ್ತಾ ಹೆಚ್ಚಾಯಿತು. ಇದರಿಂದ ಮನೆ ಬೇರೆ ಬೇರೆ ಮಾಡಬೇಕಾಯಿತು. ಆಸ್ತಿ ಬೇರೆ ಬೇರೆ ಆಯಿತು. ಹೊಲ ಭಾಗವಾಯಿತು. ಅವು ಅಕ್ಕಪಕ್ಕದಲ್ಲಿ ಹೊಂದಿಕೊಂಡೇ ಇದ್ದವು. ಅಣ್ಣ ತಮ್ಮಂದಿರು ಅವರವರ ಹೊಲದಲ್ಲಿ ಬೆಳೆ ಬೇರೆಯಾಗಿಯೇ ಬೆಳೆದರು. ಇಬ್ಬರ ಹೊಲದಲ್ಲಿ ಬೆಳೆ ಚೆನ್ನಾಗಿಯೇ ಬೆಳೆಯಿತು. ಬೆಳೆ ರಾಶಿಯಾಯಿತು. ರಾಶಿಯನ್ನು ಹಾಕಿ ಇಬ್ಬರೂ ರಾತ್ರಿ ಕಾವಲು ಕಾಯಲು ಕುಳಿತರು. ಇಬ್ಬರೂ ಒಬ್ಬರನ್ನೊಬ್ಬರು ಬಹಳ ಪ್ರೀತಿಸುತ್ತಿದ್ದರು. ಆದರೆ ಅವರು ಪರಸ್ಪರ ಮಾತನಾಡುತ್ತಿರಲಿಲ್ಲ. ಅದಕ್ಕೆ ಕಾರಣ ಆ ಮಡದಿಯರ ಕಾಟ. ಅಂದು ರಾತ್ರಿ ಅಣ್ಣ, ತಮ್ಮನ ಬಗ್ಗೆ ಚಿಂತೆ ಮಾಡುತ್ತಾ “ತಮ್ಮ ಒಬ್ಬನೇ ಇದ್ದಾನೆ, ಅವನಿಗೆ ಮಕ್ಕಳು ಹೆಚ್ಚು, ಸಂಸಾರ ದೊಡ್ಡದು. ಎಷ್ಟು ಕಷ್ಟಪಡು ತಾನೊ ಏನೋ, ಅವನು ಯಾರಲ್ಲಿಯೂ ತನ್ನ ಕಷ್ಟವನ್ನು ಹೇಳಿಕೊಳ್ಳು ವುದಿಲ್ಲ.” ಎಂದು ಚಿಂತಿಸಿ ಆತನಿಗೆ ಹೇಗೆ ಸಹಾಯ ಮಾಡಲಿ ಎಂದು ಯೋಚಿಸಿ, ರಾತ್ರಿ ತಮ್ಮ ಮಲಗಿದ್ದನ್ನು ನೋಡಿ ತನ್ನ ರಾಶಿಯಿಂದ ಧಾನ್ಯವನ್ನು ಚೀಲದಲ್ಲಿ ತುಂಬಿಕೊಂಡು ತಮ್ಮನ ರಾಶಿಯಲ್ಲಿ ಹಾಕಿ ಬಂದು ಮಲಗಿದನು. ಅದೇ ರೀತಿ ತಮ್ಮ ಕೂಡಾ ಅಣ್ಣನಂತೆಯೇ ಚಿಂತಿಸಿ ಅಣ್ಣನು ಒಬ್ಬನೇ ಇದ್ದಾನೆ, ಆತನಿಗೆ  ಮಕ್ಕಳು ಇಲ್ಲ. ಅಣ್ಣ ಅತ್ತಿಗೆ ಇಬ್ಬರೆ. ನನಗಂತೂ ಮಕ್ಕಳು ಇದ್ದಾರೆ ಸಹಾಯಕ್ಕೆ. ಅಣ್ಣನ ಸಹಾಯಕ್ಕೆ ಯಾರಿದ್ದಾರೆ? ಅವನು ತನ್ನ ಕಷ್ಟವನ್ನು ಯಾರಲ್ಲಿಯೂ ಹೇಳಿಕೊಳ್ಳುವುದಿಲ್ಲ. ತಾನು ಯಾವ ರೀತಿಯಿಂದಲಾದರೂ ಸಹಾಯ ಮಾಡಬೇಕೆಂದುಕೊಂಡನು. ಕಾರಣ ರಾತ್ರಿ ಎದ್ದು ಅಣ್ಣ ಮಲಗಿದ್ದನ್ನು ನೋಡಿ ತಾನು ತನ್ನ ಧಾನ್ಯದ ರಾಶಿಯಿಂದ ಧಾನ್ಯವನ್ನು ಚೀಲದಲ್ಲಿ ತುಂಬಿಕೊಂಡು ತನ್ನ ಅಣ್ಣನ ರಾಶಿಯಲ್ಲಿ ಹಾಕಿ ಬಂದು ಮಲಗಿಕೊಂಡನು.